專題
小JM料理台。爸爸牌。自家製奶皇月餅
早前小JM爸話今年想整自家製奶皇月餅俾小JM食。
而且仲連月餅模都訂好埋添。
小JM爸果然講得出做得到，尋晚終於出手啦！
今次整嘅奶皇月餅分咗兩日先完成，爸爸一共整左兩批！
好啦，我地就即刻睇下小JM爸今次點樣整奶皇月餅啦！
自家製奶皇月餅 (16個份量)
月餅餡 材料：
砂糖 50g
鮮奶 20g
煉奶 20g
雞蛋 30g
椰汁 90g
花奶 8g
牛油 45g
吉士粉 20g
低筋麵粉 20g
鹹蛋黃 4隻 (視乎個人喜好而加多或減少)
月餅餡 做法：
1.) 先將鹹蛋黃取出，隔水蒸熟。並將鹹蛋黃壓成蓉，備用。
2.) 將已磅好嘅砂糖、低筋麵粉、吉士粉及鮮奶混合，並攪勻。
3.) 再將煉奶、雞蛋及 一半份量嘅椰子汁加入攪勻
4.) 將花奶及剩下嘅椰汁加入，並加以攪拌
5.) 完成攪拌後，將預備好嘅牛油放面，備用。 *無需攪拌喔！*
6.) 預先煲好一鍋水，再將月餅餡材料放入內隔水蒸約20分鐘。
7.) 蒸好後取出，並趁熱加入已壓成蓉嘅鹹蛋黃，慢慢攪拌至完全混和
8.) 待攤凍後就會成為奶皇月餅餡料架啦！
攤凍後記得雪一晚！
完成咗奶皇月餅餡料之後仲要整埋月餅皮架！
月餅皮 材料：
砂糖 50g
牛油 130g
雞蛋 20g
花奶 25g
吉士粉 18g
低筋麵粉 250g
*如有需要可以買定「手粉」，整起上來就無咁易黏手同黏住個餅模啦！*
月餅皮 做法：
1.) 先將牛油及砂糖混合
2.) 再加入雞蛋及花奶加以攪拌
3.) 最後加入吉士粉及低筋麵粉攪勻，並用手慢慢搓勻。
4.) 完成後放雪櫃冰凍至少半小時。
。最後階段。
製作奶皇月餅 材料：
蛋漿
糖漿
1.) 先將已冷藏嘅奶皇月餅餡料取出，並稍為搓揉一下。
再將餡料以每粒20G分好，並搓圓備用。
2.) 將已冷藏嘅月餅皮取出，再以每粒30G分好，備用。
3.) 將月餅皮搓圓，並慢慢壓成薄薄嘅皮
再將餡料放入，並搓圓備用。
小提示：
係印模之前會建議先將包好嘅餡料再放入雪櫃雪一雪，
咁印模時就唔會咁易塌，會靚仔啲
而且啲花紋及字樣都會出啲
4.) 先將餅模及月餅撲少許手粉，再印上餅模，即成
5.) 以250度預熱焗爐，備用
6.) 先將月餅放入焗爐，以250度焗5分鐘
7.) 取出後以蛋漿於月餅面薄薄掃一層，待風乾後再多掃一層蛋漿
8.) 掃好蛋漿後再放入焗爐，以250度焗4分鐘
9.) 取出後以糖漿於月餅面薄薄掃一層再焗1分鐘，即成！
其他專題
博客名稱
傑。斯與晴
簡介
前Playgroup導師新手在職媽媽,喜歡以文字作紀錄
細數與小JM生活中既點滴動人時光及成長經歷與體驗
喜歡分享育兒逸事、幼兒食譜、親子旅行及遊玩資訊
以及回顧媽咪懷孕以來既種種經歷與點滴
人氣專題
專題標籤
